За 80 проценти зголемен извозот на земјоделски производи на рускиот пазар

,,Република Македонија и Руската Федерација традиционално имаат одлична соработка, а потенцијалот за пласман на квалитетни земјоделско-прехранбени производи на овој пазар е голем. Потврда за тоа се позитивните резултати од реализираниот извоз во изминативе три години.  Само за периодот 2009 - 2010 година, извозот во Руската федерација е зголемен за осумдесет проценти. Од пласманот на свежо овошје и зеленчук, вино  и на други земјоделско-прехранбени производи во Русија во 2010 година државава инкасира 4,3 милиони евра девизен прилив наспроти 2,4 во 2009 година". Ова го констатира министерот за земјоделство, шумарство и водостопанство Љупчо Димовски на  македонско-рускиот деловен форум кој денеска се одржува во Москва, Русија во рамки на саемот за земјоделски производи,храна и вино ,,Светот на храната".

И оваа година, додаде тој во своето обраќање, горди сме што продолжува позитивниот тренд во извозот. Само за првите 6 месеци на рускиот пазар реализиран е извоз од 6,6 милиони евра, што е околу 6 пати повеќе во споредба со истиот период лани кога сме извезле земјоделско-прехранбени производи во вредност од 1 милион евра. Ваквиот тренд, истакна министерот Димовски е резултат не само на зголемување на количините на производите кои традиционално ги извезуваме на овој пазар туку и на проширувањето на палетата на земјоделско-прехранбени производи, кои станаа атрактивни за купувачите од рускиот пазар.

- За македонските компании останува предизвикот за интензивирање на извозот на производи со поголем степен на преработка, кои се и повеќе доходовни, во прв ред на конзервираниот зеленчук и на овошјето, но и на македонското вино. Поради ова, од исклучителна важност е зголемувањето на размената на информации помеѓу  нашите држави и компаниите во делот на земјоделско-прехранбените потенцијали, на понудата и побарувачката на пазарот, со цел интензивирање и зголемување на трговската размена. Саемските манифестации, промоциите и другите форми на маркетинг се само дел од начините за да го реализираме тоа – рече министерот Димовски.

Тој упати отворена покана до руските компании да инвестираат во Република Македонија, бидејќи, како што истакна, Владата  во изминатите 5 години ги постави темелите за стопанисување во земјоделско-прехранбениот сектор на нашата држава. ,,Добредојдени сте да инвестирате во нашата земја, во изградба на проиводствени капацитети, дистрибутивни центри за земјоделски производи, ладилници, фабрики за преработка и сушење на овошје и зеленчук,  во капацитети за производство на млеко во прав. Ги повикувам руските компании да отворат дистрибутивни центри за македонски производи во Руската Федерација. Заедно да развиеме систем на заеднички вложувања и во делот на наводнувањето и одводнувањето, на пречистувањето на одпадните води" - рече министерот Димовски во обраќањето.

Инвестирањето во Република Македонија е во интерес на развој на двете економии, додаде тој, бидејќи Руската федерација традиционално е значаен трговски партнер за нашата држава. Според него,првиот чекор кој треба да се направи е да се создаде можност за слободен – безцарински третман на земјоделско-прехранбените производи од Република Македонија при извоз во Руската Федерација, особено за извозот на македонското вино.

Заменик на Претстедателот на Владата  и министер за финансии Зоран Ставрески, кој ја предводи македонската делегација во Москва, Русија и министерот Димовски го посетија штандот на кој се претставуваат македонските комапнии на саемот ,,Светот на храната,, кој деновиве се одржува во Москва.