Министерот Цветков на Форум во Букурешт

Министерот за земјоделство, шумарство и водостопанство Михаил Цветков учествува на Форумот за соработка во областа на земјоделството помеѓу Народна Република Кина и земјите од Централна и Источна Европа.

Обраќајќи се на Форумот, министерот Цветков истакна дека Владата на Република Македонија интензивно работи на создавање поволна клима за инвестирање на заинтересирани странски компании, притоа обезбедувајќи техничка помош и административни олеснувања за реализација на инвестицијата.

Форумот е во организација на Министерството за земјоделство и рурален развој на Романија, во рамките на меѓународниот саем на производи и опрема за земјоделството, градинарството, лозарството и сточарството - ИНДАГРА 2014 година во Букурешт.

Министерот Цветков денеска ќе оствари средба и со домаќинот заменик претседател на Владата на Романија и министер за земјоделство и рурален развој Даниел Константин со кој ќе разговара за соработката и размената на искуства во процесот на евроинтеграциите на нашава земја.

Покрај повеќето средби со своите колеги од Централна и Источна Европа министерот Цветков треба да оствари и билатерална средба и со министерот за земјоделство на Република Кина, Хан Чанфу со кој треба да разговара за натамошно унапредување на трговската размена и воопшто билатералната соработка меѓу двете земји.

Република Македонија и Народна Република Кина имаат потпишано Протокол за фитосанитарни услови, со што е овозможен извоз на македонскиот ароматичен тутун на кинескиот пазар, а по извршената мисија на надлежните инспекциски служби од Кина во Република Македонија наскоро се очекува листата на извозни производи во Кина да биде проширена и со млечни и месни производи.