Од 15 февруари до 31 март годинава производителите на фуражни култури ќе можат да аплицираат за финансиска поддршка за набавка на систем за наводнување „Kапка по капка“. Оваа мерка првпат воведена лани само за пченката, сега е три пати зголемена и е проширена на сончогледот и на сите други фуражни култури.

Како што истакна денеска министерот за земјоделство, шумарство и водостопанство Михаил Цветков, целта е сопствено производство на добиточна храна и намалување на производствените трошоци, а тоа е можно само преку примена на нови технологии, современи решенија за наводнување и соодветни агротехнички мерки.

- Со увоз на 62.000 тони пченка и просечен принос од 4,3 тони на хектар, Македонија е релативно ниско позиционирана во регионални и европски рамки. Моментно засадените површини со оваа култура се доволни да ги покријат домашните потреби доколку просечните приноси се зголемат за околу една половина, нагласи Цветков, додавајќи дека Министерството за земјоделство последниве две години интензивно работи на модернизација на производството на добиточна храна.

Со 250.000 евра до мај годинава Платежната агенција ќе се подготвува за акредитација за новата ИПАРД 2 мерка – инвестиции во руралната инфраструктура.

Станува збор за твининг проект финансиран од ИПА 2010 што официјално почнува денеска, а ќе се спроведува во соработка со словенечката Агенција за земјоделски пазари и рурален развој.

- Подобрувањето на руралната инфраструктура е еден од највисоките приоритети на Владата за што придонесува за подобрување на стандардот на земјоделците, на пазарната конкурентност и ефикасност, како и за зголемување на заштитата на животната средина и вработувањето во неразвиените подрачја, истакна министерот за земјоделство, шумарство и водостопанство Михаил Цветков.

Според него, македонскиот земјоделски рурален сектор се соочува со значајни предизвици во однос на можностите за квалитетно производство, конкуренција на регионалните, европските и меѓународните пазари, подобрувањето на квалитетот на живеењето, како и отворање нови работни места. Оттука, вложувањето во руралната инфраструктура е клучно.

Централна тема на годинешниот Глобален форум за храна и земјоделство што се одржа во Берлин на 17-ти јануари 2015 година, на кој учествуваа министрите за земјоделство од сите континенти, беше „Растечката потреба од храна, енергија и суровина: предизвици за одржливо земјоделство и обезбедување доволни количини на храна“.

Одржливиот развој кој се темели на трите принципи, економски раст, социјален напредок и одговорно, одржливо користење на природните ресурси, со цел заштита на животната средина се основите на идната стратегија усвоена на форумот. На новиот стратешки правец кој се нарекува биоекономија, во иднина ќе се посветува големо внимание, а концептот на биоекономија го опфаќа производството на обновливи биолошки ресурси и претворање на тие ресурси во производи со додадена вредност како храна, добиточна храна, биоенергија и биопроизводи.

Во Свети Николе денеска министерот за земјоделство, шумарство и водостопанство, Михаил Цветков ја одржа првата презентација на земјоделците за консолидација на земјоделското земјиште.

Цветков нагласи дека меѓу приоритети на Владата и на Министерството е консолидација на земјоделското земјиште.

- Во Стратегијата за 2014-2020 година еден од главните приоритети на Владата, односно на Министерството е консолидација на земјоделското земјиште, практично кажано групирање на земјоделските парцели, кои што во моментов се доста фрагментирани, односно раситнати, расцепкани. Секако за да имаме квалитетно и квантитетно земјоделско производство потребно е површините да бидат окрупнати, односно да се изврши консолидација, рече Цветков.

Тој најави дека во наредниот период ќе се одржат уште три вакви презентации и тоа во Струмичкиот, Битолско-Прилепскиот и Скопскиот регион, а на работилниците ќе се изберат два региони во кои ќе почне групирањето, односно консолидацијата на земјоделското земјиште.

Светската организација за храна и земјоделство (ФАО) останува на определбата за натамошната поддршка на реформските процеси што ги иницира Република Македонија во земјоделскиот сектор.

Ова денеска на македонскиот министер за земјоделство, шумарство и водостопанство Михаил Цветков му го потврди генералниот директор на ФАО, Хозе Грациано да Силва.

Средбата се одржа во рамки на Меѓународната зелена недела во Берлин, а на неа е договорено до крајот на годинава да се почне со планирање на новата Рамковна програма за соработка 2016-2018.

Со сегашната програма се поддржани неколку значајни проекти меѓу кои изработката на педолошката карта на Македонија, националната стратегија за земјоделство и рурален развој, Проектот за консолидација на земјоделското земјиште и Проектот за адаптација на земјоделството кон климатските промени. Во фаза на одобрување е и барањето за експертска поддршка за спроведување студија за производство на пилешко месо што неодамна Министерството го упати до ФАО, како еден од приоритетите утврдени во националната Стратегија.