Новости

Нов тип  финансиска поддршка за земјоделците кои при производството особено водат сметка за заштита на животната средина, почвата, автохтоните раси, растителните видови, пасиштата, наводнувањето и употребата на ѓубре, подготвува Министерството за земјоделство, шумарство и водостопанство. Стануза збор за таканаречените  агроеколошки мерки кои Македонија допрва ќе ги акредитира како дел од ИПАРД програмата. Потребната документација е веќе заокружена, останува повисоките стандарди да се спроведат конкретно, директно на терен.

- Со еколошкиот начин на земјоделско производство ќе се заштити животната средина, ќе се зачувуваат природните ресурси, водата, почвата и генетската диверзификација, а на граѓаните ќе им се понуди здрава и еколошка храна, рече министерот Димовски на денешната конференција „Агроеколошки мерки - можности и предизвици на земјите-членки и земјите-кандидати на ЕУ“.

Со цел да се подигне свеста кај земјоделците за идните предизвици кои ги носат климатските промени, но и да се промовираат земјоделски практики за справување со нив, Мрежата за рурален развој од денеска, со поддршка  на Американската агенција за меѓународен развој (УСАИД), почна со реализација на тригодишен проект за адаптација на македонското земјоделство кон климатските промени. Како што беше истакнато на денешната промоција на Проектот, Република Македонија е сериозно погодена од климатските промени, а најновите предвидувања ја вбројуваат нашата земја во таканаречената црвена зона, во која негативните влијанија од климатските промени ќе се почувствуваат врз земјоделството.

Управата за хидрометеоролошки работи – (УХРМ), од 15-ти април почна  со спроведување на  активности за заштита од град на обработливите површини со противградобијни ракети. Според утврдената динамика, оваа активност УХМР ќе ја спроведува до 15-ти октомври годинава.

Противградобијната ракета спаѓа во групата експлозивни материјали кои по дејствување на градоносните облаци имаат систем на самоуништување, се распаѓаат на повеќе делови со помали димензии. Заради опасноста во некои од нив да изостане или да не биде целосен процесот на самоуништување, можно е во текот на целата година цели ракети или поголеми парчиња да се најдат на земјата. Доколку со ракетите ракуваат нестручни лица тие се потенцијална опасност.

УХМР ги предупредува граѓаните кои ќе дојдат во контакт, пронајдат или забележат такви средства и предмети, да не ги допираат и веднаш да ја известат најблиската станица на МВР, Регионалниот центар за управување со кризи или Радарскиот центар најблиску до нив.

Министерот за земјоделство, шумарство и водостопанство Љупчо Димоски денеска го посети Хидробиолошкиот институт во Охрид, каде присуствуваше на уништувањето на дел од мрежите и опремата за криволов, запленети од рибочуварските служби на Охридското Езеро.

- Станува збор за 1.303 парчиња мрежи, со вкупна должина од 52 километри. Тоа се мрежи на луѓе кои не го сакаат езерото и вршат криволов покрај сите напори што Министерството за земјоделство заедно со Хидробиолошкиот институт ги вложува за негово порибување и заштита, рече Димовски. 

Тој нагласи дека како и досега така и во иднина нема да се толерираат таквите противзаконски активности, односно дека Министерството ќе ги преземе сите законски средства во негова ингеренција за целосно спроведување на одредбите пропишани со Законот за рибарство и аквакултура. 

,,Министреството за земјоделство,шумарство и водостиопанство, наскоро ќе инсталира специјален електронски софтвер кој ќе ги открива производителите на тутун кои за реколтата 2012 година склучиле двојни и тројни договори со откупните компании. Согласно  законските одредби, за нив ќе следува соодветна казна. Владата на Република Македонија во изминативе години, преку субвенции, од буџетот извои значителна сума пари за поддршка на производството на тутун и затоа ќе вложиме максимални напори за годинашниот откуп да се почитува Законот за тутун и Правилникот за откуп и од страна на производителите и од страна на откупувачите.,, Ова  го соопшти министресот за земјоделство,шумарство и водостопанство Љупчо Димовски на денешниот работен состанок со откупувачите на тутун на кој се разговараше за неодамнешните предлози на тутунопроизводителите за зголемување на откупните цени и за подготовките за новата производствена сезона.