На денешниот состанок во Министерството за земјоделство, шумарство и водостопанство меѓу земјоделски здруженија и асоцијации, земјоделски задруги и претставници на македонската асоцијација на преработувачи-МАП беше договорена откупната цената за најзастапената пиперка за индустриска преработка, куртовската капиј.

Куртовска капија од прва класа, членките на МАП и градинарите, се согласија да  се  откупува по 22 денари за килограм. Мешаната прва и втора класа  по 18,а втората класа по 13 денари за килограм.

Како што истакна министерот за  земјоделство, шумарство и водостопанство Михаил Цветков се очекува понудените цени да ги мотивира земјоделците да потпишат договори со преработувачите и да го решат долгогодишниот проблем, односно да обезбедат сигурен пласман на своите производи.

Во договорите детално се опишани класите и мерилата за квалитет по кои треба да се врши откупот,а доколку се појави проблем во проценката на класите,посочи министерот Цветков, незадоволната страна може да се обрати до Државниот инспекторат за земјоделство.

Министерот за земјоделство, шумарство и водостопанство Михаил Цветков денеска ќе учествува на изборот за генерален директор на ФАО за наредниот четири годишен период. Изборот ќе биде во рамките на 39-тата Конференција на Организацијата за храна и земјоделство на Обединетите нации - ФАО во Рим.

На Конференцијата која се одржува од 6-ти до 13-ти јуни, ќе учествуваат високи претставници од земјите членки на ОН, а во фокусот на интерес ќе бидат разговорите за постигнување на милениумските развојни цели за искоренување на сиромаштијата и обезбедување доволно храна за растечката популација во светот.

Учесниците на Конференцијата ќе ги усвојат извештаите и препораките за спроведување на програмата на ФАО до 2017 година, а истовремено, ќе се разгледуваат и препораките од извештаите на Светската здравствена организација од аспект на безбедност на храна.

Македонски млечни и месни производи ќе може да се извезуваат на рускиот пазар. За исполнување на барањата за да се реализира извозот, како и за создавање заштитни механизми за злоупотребите со увоз на земјоделски производи во Русија со лажни македонски сертификати, денеска е потпишан Меморандум помеѓу македонските Министерство за земјоделство и Агенцијата за храна и ветеринарство со Федералната служба за ветеринарен и фитосанитарен надзор на Руската Федерација.

Со Меморандумот на техничко ниво треба да се регулираат ветеринарните и фитосанитарните услови и барања за домашните оператори за храна кои сакаат  да извезуваат во Русија, за што се преговара подолго време. До Агенцијата за храна досега се доставени барања за извоз од 12 оператори, кои ќе бидат подложени на инспекција од комисија од Руската федерација кон крајот на август или почетокот на септември годинава. Очекувањата се првите производи да бидат извезени до крајот на годинава.

Министерот за земјоделство, шумарство и водостопанство Михаил Цветков денеска ги додели договорите за користење на крупен и ситен дивеч на седум ловишта под концесија во ловните реони Делчево, Македонска Каменица, Прилеп и во Македонски Брод.

Со ловиштето „Стровија“, во следните 20 години ќе управува друштвото за лов „Баллтин Клепалл“ Црнилиште - Долнени, а концесијата изнесува  2.040.000 денари за првиот 10 годишен период.

Друштвото за услуги, трговија и промет „Петрин Лоџ“ ДООЕЛ Македонски Брод е идниот концесионер на дивечот во ловиштето „Требовље“, за 1.081.300 денари, додека ловното здружение „Саса“ од Македонска Каменица“ ловиштето „Вратиславци“ во наредните 10 години ќе го користи за лов на ситен дивеч за 270 илјади денари.

Ловечкото здружение „Острец“ - Делчево ќе стопанисува со 4 ловишта  и тоа: „Влаина“ за 656.500 денари, „Голак“ за 957 000, „Бигла“ за 518 илјади и „Киселица“ за 254.000 денари за 10 години.

Ловиштата се доделени по пат на електронско јавно наддавање.

Откупот на земјоделските производи, нивната продажба и извозот, беа темите на кои денеска во Струмица разговараа ресорниот министер, производителите и преработувачите. Она што беше констатирано е дека  во моментов проблем со увоз на земјоделски производи од странство нема, но постои проблем со извозот бидејќи полека ама сигуно традиционалните пазари на кои се пласираа македонските земјоделски прозводи почнуваат да ги освојуваат и околните држави кои нудат се поквалитетно производство.

,,Времињата се менуваат, а и ние треба да се менуваме, да ги превземеме сите чекори кои што се неопходни, да ги искористиме сите средства кои што ни стојат на располагање во развој на земјоделието како во технички средства, помагала за поквалитетно производство исто така и во семенски материјал кој што ќе даде добар квалитет и добар производ“, рече Михаил Цветков - министер за земјоделство.