Новости

Расниот состав, исхраната, здравствената заштита и крмната база се клучни фактори за подобро млекопроизводство. Овие параметри се дефинирани како приоритети во стратегијата за подобрување и следење на квалитетот на млекото 2013-2020 што денеска беше презентирана пред Советот за земјоделство и рурален развој.

- Станува збор за стратешки документ кој го трасира развојот на млекопроизводството, подигнувањето на неговиот квалитет и задоволувањето на условите што ги бара Европската унија. Се надеваме дека до 2020 година ќе ги исполниме сите потребни стандарди и критеруми, изјави министерот за земјоделство, шумарство и водостопанство Љупчо Димовски.

На Скопскиот саем од денеска до сабота се одржува 62. Меѓународен саем за широка потрошувачка Агрофуд 2012 на кој  се претставени најновите земјоделски машини, насади и вештачки ѓубрива, како и достигнувања во органската храна.

Саемот се простира во две хали на површина од 5.000 метри квадратни, а за првпат годинава е поставен и Слоу фуд Македонија каде ќе се подготвува традиционална здрава храна, а ќе се претстават 12 конвивиуми од Македонија.

Саемот го отвори министерот за земјоделство, шумарство и водостопанство Љупчо Димовски кој меѓу другото истакна дека Македонија има со што да се пофали кога станува збор за земјоделството и оти македонските земјоделски производи се одликуваат со одличен и посебен квалитет.

Тоа, смета Димовски, е дополнителен мотив стратешки и заеднички да се гради стратегијата за промоција на земјоделските производи во земјата и во светот.

Министерот и заменик министерот за земјоделство, шумарство и водостопанство Љупчо Димовски и Зоран Коњановски денеска во Битола пуштија во употреба лабораторија за испитување и анализа на квалитетот на сирово млеко, која претставува прва ваква приватна инвестиција во Република Македонија.

Пред неколку дена на седница на Владата на Република Македонија, министерот Димовски информира дека била усвоена пет годишната национална програма за развој на земјоделството и руралниот развој каде што на земјоделците им се овозможува зголемување на вкупниот износ на субвенционирањето, но и обврска за исполнување на одредување на критериуми во функција на поголем квалитет на произведеното.

Владата ја донесе Програмата за земјоделство и руралeн развој за период од 2013 до 2017 година со која за првпат за пет години се дадени насоки како ќе се одвива финансиската поддршка за земјоделците.

Планирано е во следните пет години да бидат доделени вкупно 725 милиони евра субвенции од кои во 2013 година - 135 милиони евра, во 2014 - 140 милиони евра и од 2015 до 2017 година по 150 милиони евра.

- Досега беа носени програми за финансиска поддршка за период од една година што на земјоделците им даваше чувство дека може да дојде до некакви посериозни измени во следната година. Со цел да ја избегнеме таа несигурност се одлучивме овој пат да донесеме петгодишната програма во која на детален начин се кажува во која насока ќе одат субвенциите, истакнаа денеска на заедничка прес-конференција вицепремиерот за економски прашања Владимир Пешевски и министерот за земјоделство, шумарство и водостопанство, Љупчо Димовски.

Македонија ќе црпи европски искуства за подобрување на конкурентноста на земјоделско-прехранбениот сектор преку 132-от Семинар на Европската асоцијација на агроекономисти што во наредните три дена се одржува во Скопје.

На семинарот, организиран од Факултетот за земјоделски науки и храна во Скопје, Шведскиот универзитет во Упсала, Европската Асоцијација на агроекономисти и здружението на агроекономисти на Македонија, ќе бидат презентирани 30-тина трудови на претставници од 10 држави челнки на ЕУ и аспиранти за членство на темата на семинарот „Дали транзицијата навистина заврши во европското земјоделство – Нови димензии и предизвици на транзициските и посттранзициските процеси во земјоделскиот и прехранбениот сектор во Европската унија и земјите кандидати и соседните земји“.