Новости

Министерот за земјоделство, шумарство и водостопанство Љупчо Димовски денеска одржа состанок со Потсекторската група за житни култури. На денешниот состанок, се констатираше дека примената на одредени агротехнички мерки или некоја група хербициди, како и неупотребувањето квалитетен семенски материјал се меѓу потенцијалните фактори што го намалија квалитетот на оризот.

- Се соочуваме со неочекуван проблем за кој причините се непознати. Затоа бараме помош од сите институции кои се во можност да дадат насоки и совет. Претстојат консултации со науката која очекуваме да се произнесе и околу можноста кршливите зрна ориз да се искористат како сточна храна, изјави министерот Димовски по состанокот.

Се уште не е утврдена причината за енормната кршливост на оризовото зрно што годинава ги затече производителите. Приносот, велат, е преполовен и кои било мерки да се донесат, нема да ја надоместат загубата.

Ретко на која домашна трпеза не се нашол познатиот и признат по квалитет македонски костен. Неговото одгледување има многу позитивни страни, долговечен е, достигнува и над 500 години старост, има одлична родност, мал број природни непријатели (болести и штетници), а доколку се одгледува во поволни еколошки услови не мора да се третира со никакви заштитни средства, рече министерот за земјоделство, шумарство и водостопанство Љупчо Димовски при денешната посета на стопанскиот капацитет за преработка на костен „ДРА-ГО“ во Кичево.

Оваа благородна овошка, додаде тој, освен на македонскиот пазар, се пласира и во странство. Компаниите кои ги откупуваат костените ги пласираат главно во Романија, Бугарија и Италија, каде што се користат пред се во кондиторската индустрија.

Министерството за земјоделство, шумарство и водостопанство изразува жалење за одлуката на таканаречениот Иницијативен Одбор на оризопроизводителите и најавата  „Масовен протест“ на оризопроизводителите закажан за утрешниот ден.

Во оваа прилика Министерството посочува на невистините кои се изречени во соопштението, поврзани со, како што тие го нарекуваат „историски договор што го договорија Владата преку ресорното Министерство за земјоделство со оризопроизводителите и откупувачите .“

Потсетуваме дека Министерството за земјоделство, шумарство и водостопанство вложи напори на иста маса да седнат претставници на оризопроизводителите од една страна и откупувачите на ориз, од друга страна за постигнување договор за формирање на просечна откупна цена од 20 денари за килограм за оризова арпа од овогодишната реколта.

Притоа дефинираниот рандеман од 50% беше прифатен од двете страни, како единствени фактори на договорите.

Министерот за земјоделство, шумарство и водостопанство Љупчо Димовски денеска го посети градскиот откупен пункт на прилепскиот Тутунски комбинат каде пред четири дена почна откупот на тутунот.

Тој изрази задоволство од почетокот на откупот и согласно очекуваниот род, за догодина најави исплата на 25 милиони евра субвенции.

- Според производителите, реколтата која очекуваме да тежи околу 25.000 тони, е со висок квалитет. Тоа го потврдуваат и анализите, изјави министерот Димовски, додавајќи дека исплатата на преземените количини ќе биде во рок од седум до десет дена.

Тој смета дека Македонија и тутунопроизводителите „извојуваа” значајна победа зашто Светската зравствена организација на состанокот во Сеул своите предлози за намалување на ориенталскиот тип тутун ги одложи за 2014 година.

Компанијата Пекабеско денеска го пушти во употреба новиот производствено-логистички центар за производство на месни и сувомеснати производи.

Вкупната инвестиција е 13 милиони евра, од кои 9,5 милиони се обезбедени преку кредит од  Европската инвестициска банка (ЕИБ) и Македонската банка за поддршка на развојот, а останатите се сопствени средства на компанијата.

Министерот за земјоделство, шумарство и водостопанство Љупчо Димовски истакна дека центарот е изграден по сите европски и ХАСАП  стандарди за производство на сувомесни производи.

- Фабриката има капацитет за производство од 35 тони на ден, конфекционирање на свежо месо, производство на паштети, складирање  и расекување на свежо месо, пакување на смрзната риба, пакување на смрзнат зеленчук и овошје и магацини со 7.000 палетни места на сите режими на лагерување. За сето ова да се постигне ќе бидат потребни најмалку 30 тони свежо или замрзнато месо како суровина дневно, рече министерот Димовски.