Соопштенија

Во рамките на посетата на Народна Република Кина, заменик министерот за земјоделство, шумарство и водостопанство, м-р Перица Иваноски, ја посети и Провинцијата Џиангсу, каде учествуваше во церемонијата на отворањето на 12-от Меѓународен Агро-експо саем.

Во рамките на своето обраќање на отворањето на саемот, заменик министерот Иваноски ги истакна одличните политички односи меѓу двете земји и додаде дека тие треба да бидат следени со поинтензивна економска соработка во делот на увозот и извозот на македонски производи на кинескиот пазар, особено виното и преработките од овошје и од зеленчук. Заменик министерот ја истакна и важноста за привлекување на кинеските инвеститори во македонскиот земјоделско-прехранбен сектор.

Министрите за транспорт и врски и за земјоделство, шумарство и водостопанство Миле Јанакиески и Љупчо Димовски попладнево ги посетија поплавените места во струмичко-валандовскиот регион од врнежите во изминатата ноќ со цел лично да се запознаат со состојбите.

Во валандовскиот регион синоќа наврнале 85 литри, додека во Струмичко 52 литри дожд на метар квадратен.

- Ќе помогнеме и ќе излеземе во пресрет во оној дел што е во надлежност на Владата за да се надмине оваа ситуација. Во моментов сите регионални патни правци се проодни, а најголем дел од локалните патишта се веќе расчистени, рече министерот Јанакиески.

Според Димовски, од поплавите има оштетување на дел од земјоделските површини.

- Ќе гледаме да помогнеме во делот на финансиските средства колку што може, како и во делот на техничките средства и советодавната-консултантска помош, истакна министерот Димовски.

Од страна на А1 телевизија повторно се отвора таканаречениот случај „Злетовица“.

Симптоматично е што повторно се изнесуваат груби невистини и погрешни податоци за овој капитален објект од особено значење за регионот од источниот дел на Македонија каде што се опфатени повеќе општини.

Во досегашните соопштенија на Министерството за земјоделство, шумарство и водостопанство на јавноста и беа изнесени факти околу изградбата на Хидросистемот „Злетовица“.

Уште еднаш ги повторуваме:

Тендерот за изградба на првата Фаза на хидро системот „Злетовица“ ги вклучува Пакет 1 – Пробивање пат до браната Кнежево, Пакет 2 – Изградба на браната „Кнежево“ и Пакет 3 – Изградба на зафати до Пробиштип и Штип и цевковод до Свети николе.

Овој Тендер е објавен уште во 2003 година.

Продолжува акцијата за сузбивање на боровиот четник која вчера беше прекината поради влошување на временските услови. Во раните утрински часови, Министерството за земјоделство во соработка со Катедрата за заштита на шумите при Шумарскиот факултет, утре, во штипскиот регион, ќе врши уништување на боровиот четник со авиотретирање.

Според програмата, акцијата ќе се спроведе  на локалитетите Сушево, Криви Дол, Благово, Бурилски Рид, Кадрифаково – Богословец, Милино, како и во месноста Поглед-Малински Пат и Ѓуриште.

Акцијата за уништување на гасениците од боровиот четник според утврдената динамика, треба да се реализира и во Свети Николе, Велес, во Демир Капија, Кавадарци и  во Кумановско.

За подетални информации за спроведувањето на акцијата, населението ќе биде информирано преку локалните медиуми.

По предлог на Министерството за земјоделство, шумарство и водостопанство Владата на Република Македонија на вчерашната седница донесе Одлука за престанување на важење на мерката за заштита на пазарот на пченица и на брашно со врзување на количествата на увоз на брашно со откуп на домашна пченица во сооднос 1 спрема 4.

По стабилизирање на домашниот и на странскиот пазар со пченица и со брашно и со претходно престанување на важноста на одредбата од Одлуката за врзување на увозот со откуп на домашна пченица, со најновата Одлука, увозот на пченица и на брашно ќе се врши без дополнителни обврски.

Оваа одлука влегува во сила првиот ден по нејзиното објавување во “Службен весник на Република Македонија” .

Времената Одлука од 21.07.2010 година, беше донесена заради заштита на домашниот пазар со пченица и брашно, но и на земјоделските производители. Во периодот на незиното важење, таа ги постигна ефектите. Откупната цена на пченицата од 7 денари за килограм во почетокот на жетвата, достигна до 10 денари на крајот од откупната кампања.