По силното невреме што вчера го зафати скопско- кумановскиот регион, веднаш, утрово побаравме официајална информација од Управата за хидрометеоролошки работи врз основа на која ќе ја почнеме постапката за формирање на комисии за увид на состојбата и за проценка на штети врз земјоделските капацитети.

Денеска исто така дадов и налог, вработените од подрачните единици на министерството, да излезат на терен и до утре да достават  првичен увид за настанатите штети.

Како и во претходниот случај со невремето во тетовско, министерството за земјоделство во најкус можен рок ќе поднесе информација до Владата која  ќе донесе одлука за натамошна постапка за проценка и утврдување на висината на штетата од елементарната непогода.

Доколку обештетувањето ќе биде според законот за земјоделство, земјоделците навремено ќе бидат информирани и за роковите за поднесување на барањата за проценка до најблиската подрачна единици на министерството.

Министерот за земјоделство, шумарство и водостопанство Љупчо Николовски, денеска, на нивно барање, имаше средба со претставници на Гранскиот Независен Синдикат на полицијата. На состанокот се говореше за доставениот Предлог Колективен договор за шумска полиција и администрација, за шумска полиција на Република Македонија.

Синдикалците побараа почеток на сериозни преговори за брзо усвојување и потпишување на ваков документ, кој, според нив, недостасува 19 години. Беше искажано незадоволство од актуелната состојба во шумската полиција, како кога се во прашање основните права и услови за работа, така и кога станува збор за нивната безбедност.

- Личното и формациското оружје со кое ракуваме е застарено и 60% нефункционално. Затоа имаме сериозна потреба од ваков подзаконски акт, со кој ќе се намалат штетите и за Буџетот, односно ќе го намалиме одлевањето на парични средства од МЗШВ, поради трошоците за загубени судски процеси, - рекоа шумските полицајци.

Министерот за земјоделство, шумарство и водостопанство Љупчо Николовски попладнево имаше работен состанок со амбасадорот на Европската Унија во Македонија, Самуел Жбогар.

Николовски изрази задоволство од посетата на високиот гостин, особено поради тоа што Македонија има голема поддршка од ЕУ, што очекува да биде случај и во иднина, како на политички план за државата во целина, така и кога е во прашање македонското земјоделство.

-Ќе работиме за иднината на граѓаните и веруваме дека ќе имаме успех, секако со очекуваната поддршка од Ваша страна, - рече Николовски.

Амасадорот на ЕУ му го честиташе на Николовски изборот за министер за земјоделство во новата Влада на Република Македонија и изрази задоволство од видениот ентузијазам во државата, како и од оптимизмот кој, како што рече, е присутен во Брисел околу иднината на Македонија.

Од денеска отвораме интензивен дијалог со земјоделците. Сакаме да ги слушнеме нивните предлози, сугестии, размислувања,... Само така, со постојани, конзистентни, искрени разговори, ќе дојдеме до квалитетни решенија, изјави министерот за земјоделство, шумарство и водостопанство Љупчо Николовски.

Пред неговата прва средба со производителите во Министерството, Николовски најави дека приоритет на новите владини политики ќе биде воведувањето зелена нафта и исплатата на субвенциите. Ќе се анализира, рече, и работењето на Платежната агенција за да се утврди одговорност, односно да се прецизира кои се причините за блокираната распределба и за се уште непочнатото аплицирање за годинашната поддршка.

Според него, треба да се доисплатат вкупно 3,5 милијарди денари од кои околу 1,5 милијарди за тутунот, а проектираното зголемување на 160 милиони евра останува како една од главните определби. Неделава, дополни, исплатата продолжи и се префрлени 439 милиони денари.

Земјоделците и земјоделските стопанства  од тетовското село Порој  чии ниви беа погодени од завчерашното невреме што поскоро да достават барања за отштета. За општинските власти пак да се обезбеди потребната механизација за расчистување на затрупаниот регионален пат Тетово-Јажинце кај Порој каде сообраќајот е во прекин три дена поради големите наноси од кал, земја и камења. Интензивно ќе продолжи да се работи и на изградба на привремен премин преку реката  откако од двата моста низ Порој едниот беше целосно уништен, а другиот е оштетен.

Ова го истакнаа при денешниот увид на состојбата на терен министрите за земјоделството, шумарство и водостопанство Љупчо Николовски, за транспорт и врски Горан Сугарески, за економија Крешник Бектеши и министерот без ресор задолжен за странски инвестиции Рамиз Мерко придружувани од градоначалничката на општина Тетово.