Новости

Министерот за земјоделство,шумарство и водостопанство Михаил Цветков по покана од заменик претседателот на Владата на Романија и министер за земјоделство и рурален развој, Даниел Константин денеска ќе учествува на Форумот за соработка во областа на земјоделството помеѓу Народна Република Кина и земјите од Централна и Источна Европа.

Форумот, на кој ќе се обрати и министерот Цветков, е фокусиран на соработка во инвестициите и извозот на земјоделски производи помеѓу Централна и Источна Европа и Кина.

Форумот е во рамките на меѓународниот саем на производи и опрема за земјоделството, градинарството, лозарството и сточарството - ИНДАГРА 2014 година.

Површините што годинава се насеани под ориз се 4.600 хектари, од кои се очекува родот да тежи околу 15.000 тони оризова арпа или осум до 10 илјади тони квалитетен бел ориз, изјави министерот за земјоделство, шумарство и водостопанство Михаил Цветков на денешните завршни активности во рамките на манифестацијата „Денови на кочанскиот ориз“.

Заложба на Владата е, додаде, овие површини да бидат зголемени за наредните 10 години на осум до девет илјади хектари, колку што во кочанскиот регион беа застапени во осумдесеттите години на минатиот век.

Според министерот Цветков, родот е одличен, квалитетот е добар и пазарот годинава ќе биде конкурентен.

Во трговскиот центар „Капитол“ во скопската општина Аеродром денеска се оддржа седмиот „Фестивал на органска храна“. Организатор на манифестацијата е здружението на производители на органска храна во соработка со Организацијата на потрошувачи на Македонија,а подржано од  Министерството за земјоделство, шумарство и водостопанство.

На повеќе штандови им се нудат на потрошувачите разни видови овчо сирење, месо, компири, маслинки, ореви, бадеми, мед и други производи од органско потекло.
Целта е да се подигне свеста кај потрошувачите да конзумираат органска храна со што ќе се подобри квалитетот на животот и ќе се создаваат здрави генерации.
- Владата започна кампања со цел да го поттикне користењето на органската храна со што би се придонело луѓето да го сочуваат здравјето и да се подобри квалитетот на нивниот живот, изјави заменик-министерот за земјоделство, шумарство и водостопанство, Ванчо Костадиновски.

Македонија ќе ги искористи искуствата од спроведувањето на ИПАРД-1 Програмата за успешно реализирање на следната, ИПАРД-2. Со цел максимално повлекување европски пари во периодот 2014–2020 година, меѓу останатите мерки се предвидува и формирање фонд за претфинансирање кој би ги помогнал земјоделците.

Како што изјави ресорниот министер Михаил Цветков пред денешната седница на Агросоветот, главни причини за слабата искористеност на ЕУ-фондовите се уште се токму недоволната финансиска моќ на нашите производители и критериумите што ги поставува Европската комисија.

- Имајќи ги предвид искуствата од спроведувањето на ИПАРД-1 Програмата која досега е искористена само 11 отсто, работиме на мерки кои ќе помогнат ситуацијата значително да се подобри и Македонија да успее да извлече максимум средства кои се и тоа како добредојдени за агробизнисот и развојот на руралната економија, истакна Цветков.

Во првите 100 дена од работењето на Владата, Министерството за земјоделство,шумарство и водостопанство реализира и започна голем број на проекти – истакна министерот Цветков на денешната прес конференција.

Покрај секојдневната комуникација со земјоделците и нивните здруженија, посочи министерот Цветков, министерството успешно го заврши аплицирањето за субвенции каде што беа поднесени 74.000 барања, а дел од нив веќе се исплатени.

Од оваа година, земјоделците ги добиваат субвенциите по однапред дефиниран „Календар за субвенции“, со кој точно е определена динамиката на аплицирање и на исплатата на субвенциите која е усогласена според потребите на земјоделците.Досега, според овој календар се исплатени тутунарите, а во периодот септември-октомври следи исплатата за полјоделските култури.