Соопштенија

Mинистерот за земјоделство,шумарство и водостопанство Љупчо Димовски денеска ја посети општина Велес. Заедно со градоначалникот на Велес Горан Петровски ги посетија местата кои што настрадаа од невремето проследено со град.

Министерот Димовски оствари средба и со жителите на селата Раштак и Башино село.

Управата за хидрометеоролошки работи која работи во состав на Министерството за земјоделство,шумарство и водостопанство во изминативе три дена интензивно ја следеше состојбата со градоносните облаци.

На 8 јуни беше интервенирано со 24 противградобијни ракети на подрачјето на општините Велес,Чашка,Лозово и Свети Николе од радарскиот центар Ѓуриште.

На 9 јуни поради авионскиот сообраќај Управата не беше во можност да делува, но состојбата се следеше од истиот радарски центар.

Министерството потсетува дека употребата на противградобијните ракети е забранета во градските подрачја како и тоа дека делувањето зависи од дозволата од контролата на летање и од  авионскиот сообраќај.

Управата ќе продолжи со лсдење на состојбата со градоносните облаци и доколку има потреба ќе го вклучи системот на делување.Во наредните неколку денови според Управата не се очекува големо невеме проследено со град.

По појавата на епидемијата од бактерија ешерихија коли во повеќе европски земји, Министерството за земјоделство,шумарство и водостопанство во изминатиот период, преку контактите со нашите дипломатски претставништва, презеде итни мерки за обезбедување на алтернативни пазари за македонските градинарски производи. Целта на овие активности е да се интензивира пласманот на нови и на регионалните пазари.

Поради тоа изминатите денови е евидентиран прогрес во извозот на градинарските производи особено на пазарот на Руската Федерација и на Косово. Воедно, сите испораки се документарно проследени со неопходната потврда за фитосанитарна исправност на производите.

Министерството за земјоделство, шумарство и водостопанство е постојан контакт со произведувачите на градинарски производи и во рамките на своите надлежности излегува во пресрет на нивните барања.

Годинава се очекува повисок принос пченица за околу 10 отсто во споредба со лани, зошто освен што се насеани 4 до 5 илјади хектари повеќе, интензивно се применуваат современи агротехнички мерки, а земјоделците се повеќе употребуваат квалитетен семенски материјал. Владините мерки кои предвидуваат и зголемување на субвенциите, се насочени токму кон намалување на досегашната увозна зависност од лебно жито.

Ова го истакна министерот за земјоделство,шумарство и водостопанство Љупчо Димовски на денешната манифестација „Ден на пченицата“ што ја организира „Агроунија“ - Скопје под покровителство на Министерството за земјоделство, шумарство и водостопанство.

- Во 2010 просечниот принос пченица беше 2,9 тони на хектар, а годинава со оглед на квалитетниот семенски материјал што беше искористен, очекуваме 3,2 тони. Ова секако е добро, но не е доволно. Македонија, за жал, е се уште увозно зависна за покривање на потребите од лебно жито, изјави министерот Димовски.

Во врска со објавениот Јавен конкурс за давање на концесија на рибите за организирање на рекреативен риболов на риболовните ревири и рекреативните зони објавен во “Службен весник на Република Македонија” број 45 од 7 април 2011 година Министерството за земјоделство, шумарство и водостопанство известува за следново:

Во делот V  од Јавниот конкурс е наведено дека отворањето на понудите ќе биде јавно десет  дена од завршувањето на предвидениот рок за нивното доставување.

Од аспект на одредбите од Законот за спречување на корупцијата, во периодот од донесување на Одлука за распишување избори до завршување на изборот на пратеници во собранието на Република Македонија и изборот на Владата на Република Македонија постои законска пречка за продолжување на започнатата постапка.

Од овие причини постапката (отворањето на понудите, изборот на најповолен понудувач и донесување на Одлука за давање на концесија ќе продолжи по изборот на Владата на Република Македонија.