Соопштенија

Поради опасноста од пожари, како последица на високaта температура, Министерството за земјоделство,шумарство и водостопанство апелира граѓаните крајно внимателно да се движат во шумите. Секоја евентуална појава на пожар, граѓаните можат да ја пријават на отворената телефонска линија 02-155-22 на  јавното претпријатие ,,Македонски шуми,, како и во противпожарните станици, во единиците на локалната самоуправа, полицијата и во Дирекцијата за заштита и спасување.

Согласно Законот за шуми, казната за физичките лица кои  ќе се затекнат како се движат во шума за време на забраната за движење во шума која што ја донесува корисникот или сопственикот на шумата, а ако за тоа нема добиено одобрение од него се движи од 2 до 3 илјади евра.

Казната за правните лица кои не преземале мерки за заштита  на шумите од пожари изнесува од  15 до 20 илјади евра.

Промоцијата на македонските земјоделско-прехранбни производи се фокусира во две насоки. Првата е привлекување на директните странски инвестиции во домашниот сектор, а втората е зголемување на извозот особено со отворање на нови атракстивни пазари надвор од традиционалните, истакна заменик министерот за земјоделство, шумарство и водостопанство Перица Иваноски на презентацијата за потенцијалите на земјоделството пред економските промотори во странство. На презентацијата на промоторите им беа потенцирани приоритетите и пакетите на поволности за странските инвеститори понудени од Владата на РМ кои треба да го олеснат патот до реализацијата на инвестициите во земјоделскиот сектор и можностите за понатамошно зголемување на извозот и негова диверсификација на нови дестинации како Кина, Русија, Блискиот Исток и др.

Република Македонија како кандидат за членство во Европската Унија е целосно посветена на прилагодувањето кон  aquis communitaire на ЕУ во сите области на земјоделскиот сектор, што вклучува и заштита и зачувување на природната животна средина во процесот на земјоделското производство. Токму во таа насока се и агро еколошките мерки кои поддржуваат иницијативи за одржување или менување на секојдневните практики на управување со производствениот процес, со цел да се обезбеди соодветен еколошки бенефит, истакна министерот за земјоделство,шумарство и водостопанство Љупчо Димовски на денешниот втор состанок на Управен комитет за проектот ,,Развој и спроведување на агро - еколошки мерки ,,.

Во македонскиот зеленчук нема присуство на бактеријата ешерихија коли. Безбеден е и сосема исправен за консумирање, порачаа денеска министерот за земјоделство, шумарство и водостопанство Љупчо Димовски и директорот на Агенцијата за храна и ветеринарство Дејан Рунтевски.

Агенцијата, како што истакнаа Димовски и Рунтевски на прес-конференција, изминатите 10 дена спроведе вонредни контроли на преку 40 примероци зеленчук земени по случаен избор од малопродажбата и директно од оранжериските прозводители. Резултатите покажуваат дека доматите и краставиците се безбедни за исхрана  за јадење.

- Изминатава година во рамки на ЕУ, Македонија, како трета земја, беше втор извозник на краставица. Тоа доволно зборува за квалитетот и безбедноста на нашите производи, нагласи Рунтевски.