Владата на Република Македонија донесе решение за именување на  министерот за земјоделство, шумарство и водостопанство Љупчо Николовски, за ко- претседател на македонскиот дел на Меѓувладината македонско-руска комисија за трговско-економска и научно-техничка соработка меѓу Република Македонија и Руската Федерација.

Во фокусот на Меѓувладината македонско-руска комисија за трговско-економска и научно-техничка соработка меѓу Република Македонија и Руската Федерација, ќе бидат неколку сектори, како земјоделство,  енергетика, индустрија, трговија,транспорт, образование, наука, култура, туризам и воено-техничка соработка.

Целта на оваа Комисија е унапредување на трговско- економската и научно-техничката соработка меѓу двете земји.

За таа цел, во рамки на Комисијата се формирани работни групи од секој од погоре споменатите сектори, кои меѓусебно соработуваат и подготвуваат соодветни материјали за одржување на седниците на Меѓувладината Комисија.

Оваа Комисија беше во мирување изминатите три години поради политичката криза.

Винарската визба „Повардарие“ целосно ќе го исплати долгот за откупеното грозје кон лозарите до крајот на оваа година. Оваа одлука произлезе од денешниот состанок на лозарите со менаџментот на винарската визба, кој се одржа во Неготино, а во присуство на претставници од Министерството за земјоделство, шумарство и водостопанство и новиот градоначалник на Општина Неготино, Тони Делков.  Средбата беше организирана од страна на МЗШВ, со цел итно да се најде решение за исплата на долговите што визбата ги има кон лозарите.

На состанокот, менаџментот на ВВ „Поварадарие“ изрази уверување дека ќе бидат комплетно расчистени долговите кон лозарите за преземеното грозје за 2014, 2015 и за 2016 година. Од винарската визба посочија дека имаат залихи за извоз во странство од чија што продажба како што изјавија ќе се реализира исплатата на долговите кон лозарите.

Оваа состојба ја потврди Државниот инспекторат за земјоделство, кој изминатите денови изврши  контроли во В.В „Повардарие“ и утврди дека визбата има залихи на вино.

Винарската визба „Повардарие“ треба да го исплати долгот кон лозарите до денар, соопшти денеска министерот за земјоделство, шумарство и водостопанство Љупчо Николовски. При тоа министерот  посочи дека Државниот инспекторат за земјоделство, при контролите утврдил дека винарската визба „Повардарие“ има залихи на вино, со чија што продажба, лозарите ќе бидат исплатени.

„Записникот е веќе подготвен од ДИЗ, кој во изминатите седум дена беше во винарската визба „Повардарие“. Во наредните денови ќе правиме притисок за целосна, брза исплата на секој лозар. Сериозно сме фокусирани на ова прашање. Потпишав решенија со кои се одобрува продажбата на вино од залихите, но под услов со тие финансиски средства да бидат исплатени лозарите“, нагласи министерот Николовски.

Министерот потенцираше дека од 1-ви јуни годинава е запознаен со случајот на „Повардарие“ кој, и покрај долговите, бил игнориран изминатите 10 години.

Министерот за земјоделство, шумарство и водостопанство Љупчо Николовски, денеска присуствуваше на завршувањето на проектот „Надградба на земјоделскиот информативен систем и воспоставување на системи за размена на податоци помеѓу МЗШВ и останатите релевантни институции“, финансиран од Инструментот за претпристапната помош ИПА, на Европската унија. Целта на овој проект е функционална размена на податоци помеѓу Министерството, за земјоделство, шумарство и водостопанство и релевантните институции како што Државниот завод за статистика, Платежната агенција, и останатите инстутуции, кои располагаат со податоци потребни за анализа и креирање на идните земјоделски политики.

Проектот се спроведуваше 20 месеци во Министерството за земјоделство, шумарство и водостопанство, а беше во вредност од  700.000 евра.

Министерот Николовски истакна дека соодветното креирање на земјоделските политики придонесува кон намалување на иселувањето и задржување на населението во руралните области, а со тоа зголемување на земјоделското производство и намалување на увозот.

Министерот за земјоделство, шумарство и водостопанство Љупчо Николовски, денеска имаше работен состанок со новиот градоначалник на општина Крива Паланка, Борјанчо Мицевски.

На состанокот Николовски и Мицевски, ги дефинираа приоритетите во однос на соработката на МЗШВ и Општината Крива Паланка, во делот на земјоделството и руралниот развој.

Министерот Николовски посочи дека МЗШВ ќе биде отворено за соработка со локалната самоуправа на Крива Паланка, со поддршка преку мерките од Програмата за рурален развој, за кои општината може да аплицира.