Врз основа на неколкуте одржани состаноци со претставниците на земјоделските здруженија и на компаниите од мелничко-пекарската индустрија, на предлог на Министерството за земјоделство шумарство и водостопанство, Владата на Репблика Македонија на својата втора седница, донесе одлука за воведување на сет мерки во секторот земјоделство.

Имајќи ја во предвид актуелната состојба со жетвата, пред се на пченицата, но и законската обврска за обезбедување на потребните количини пченица за државните резерви, Владата на Република Македонија ја задолжи Агенцијата за стоковни резерви во рок од 7 дена да објави Јавен оглас за набавка на 40.000 тони пченица за потребите на стоковите резерви.

За да го стабилизира домашниот пазар со пченица и брашно, Владата донесе одлука во наредните три месеци  увозот на 1 кгр брашно да се услови со обврзувачки откуп на 4 кгр пченица од домашно производство. Исто така  воведена е и мерката со која до месец октомври се забранува извоз на меркантилна пченица.

Во Демир Капија, Свети Николе, Гевгелија, како и во валандовскиот, во струмичкиот и во виничкиот регион, утре, четврток, 28.07.2011 година според Секторот за аналитика и истражување при Дирекцијата за заштита и спасување се очекува зголемена опасност од избивање на пожари. Поради ова, припадниците на територијалните противпожарни единици и подрачните  одделенија на Дирекцијата за заштита и спасување и на Центарот за управување со кризи и утре ќе бидат на ниво на најголема мобилност во сите региони во државава.

Сончевото и топло време според најавата на Управата за хидрометеоролошки работи ќе се задржи и во текот на утрешниот ден. Според прогнозите, кон крајот на денот можeн е развој на изолирана  нестабилност  проследена со локален пороен дожд и грмежи.

Со цел да се спречи евентуалното настанување на шумски пожари Координативното тело за заштита на шумите од пожари и овој пат апелира граѓаните да ја почитуваат воведената делумна забрана за движење во шума и шумскиот ред. Забрането и палење на стрништата.

Сончево и топло време со пораст на дневната температура најавува Управа за хидрометеоролошки работи за утре и задутре.  Порастот на температурите, кој според проценките на стручните лица од  УХМР, утре ќе се движат до  34, а во четврток ќе достигнат до 37 степени Целзиусови, ја зголемуваат опасноста од појава на пожари.

Координативното тело за заштита од пожари апелира граѓаните  да ја  почитуваат делумната забрана за движење во шумите, а земјоделците да не ги палат стрништата бидејќи тоа е забрането со закон.

Казната за физичките лица кои  ќе се затекнат како се движат во шума за време на забраната без посебно одобрение од  корисникот или сопственикот на шумата се движи од 2 до 3 илјади евра. Казната за правните лица кои не преземале мерки за заштита  на шумите од пожари изнесува од  15 до 20 илјади евра.

Променливо облачно време со локален дожд и грмежи најавува за утре Управата за хидрометеоролошки работи. И покрај најавеното намалување на температурите, кои според прогнозата на УХМР утре ќе се движат од 19 степени Целзиусови во  високите планински предели и до 30 степени во низините,  Оперативното координативно тело за заштита на шумите од пожари предупредува дека иако опасноста од настанување на пожари е намалена, таа реално сеуште постои и може да предизвика големи штети, пред се во Повардарието, како и во Охридско битолскиот и Прилепскиот регион каде според УХМР не се очекуваат врнежи од дожд.

Центарот за управување со кризи (ЦУК) информира дека денес, противпожарни екипи на шумското стопанство ,,Лопушник,, на територијалната противпожарна единица од Кичево и Охрид го гаснат пожарот во село Челопеци во општина Вранештица каде во гори смрека, сува трева и  и густа ниска дабова шума. Во акцијата за гаснење на овој пожар вклучени се и два авиони на Дирекцијата за заштита и спасување.

Во кодинирана акција на Центарот за управување со кризи (ЦУК), Дирекцијата за заштита и спасување и бригадите за противпожарна заштита, и денеска се гаснеа повеќе пожари во Република Македонија.

Во текот на денешниот ден, ЦУК информира дека во близина на железничката станица Рајко Жинзифов (Скопје - Велес) се појави пожар кој се проширува кон непристапен повисок планински дел, над пругата. Теренот е со сува трева и ниска деградирана шума. Поради непристапност на теренот,пожарот ќе се гасне со авион на Дирекцијата за заштита и спасување.

Вчера, на територијата на Република Македонија,  се гаснеа пожари на неколку локации. Само во скопско според Центарот за управување со кризи биле евидентирани 17 пожари каде биле зафатени локации претежно со сува трева. Во гаснењето на пожарите во скопскиот регион интервенирале пожарникарите од Бригадата за противпожарна заштита на Град Скопје.