Новости

Денеска во Владата на Република Македонија се одржа првата конститутивната седница на Комитетот за земјоделство и безбедност на храна, со кој претседаваше претседателот на Владата на Република Македонија Зоран Заев. Во Комитетот членува министерот за земјоделство, шумарство и водостопанство Љупчо Николовски, посебната советничка на за земјоделство на ПВРМ, Ленче Николовска, вицепремиерот за економски прашања Кочо Анѓушев, министрите за финансии, животна средина, здравство, директори на надлежни институции.

Премиерот Заев посочи дека земјоделците, сточарите и агробизнисмените најдобро знаат што е она што владата треба да го преземе за да се овозможи рентабилно земјоделство и затоа низ работата на овој комитет ќе се носат заеднички одлуки во интерес на земјоделците.

Министерот Љупчо Николовски информираше за останатите точки и теми што ќе бидат разгледани на наредните седници на Комитетот за земјоделство и безбедност на храна.

Унапредување на трговската размена со Велика Британија и инвестиции на англиски компании во македонското земјоделство – ова беа дел од темите на  состанок во Лондон, помеѓу македонскиот министер за земјоделство шумарство и водостопанство, Љупчо Николовски и државниот министер за земјоделство, рибарство и храна на Велика Британија , Џорџ Јустис.

На работниот состанок е разгледана и можноста за користење на англиски фондови за развој во областа на земјоделството.Двајцата министри се договориле двете држави да работат на унапредување на трговската размена со земјоделско-прехранбени производи.

Во рамки на официјалната посета на Лондон, министерот Николовски, имаше средба и со претставници на англиско-македонската корпорација која што е веќе регистрирана во Македонија и преку која што ќе се спроведува проектот „Елисиум“, кој што е од исклучително значаење за македонското земјоделство.

Континуирано следење на состојбата со откупот и цените на пролетната зелка, како и на цените на овој производ  на странските пазари, создавање на цврсто договорно производство – ова беа дел од заклучоците на денешниот состанок во Министерството за земјоделство, шумарство и водостопанство со производителите на зелка.

На состанокот присуствуваа дел од поголемите производители на зелка, претставници од МЗШВ и од Владата на Република Македонија.

Производителите на зелка кои вчера излегоа на предупредувачки протест, посочија дека откупната цена на пролетната зелка сега е на задоволително ниво, но стравуваат дека може во следните денови да се намали.

Во моментов откупната цена на пролетната зелка е 30 денари за килограм. Земјоделците побараа оваа цена да се задржи во следните две недели, за да можат да ги покријат трошоците и да имаат рентабилно производство.

Пролетната зелка во моментов се извезува во Русија, Полска, Романија, Белорусија и Украина. Земјоделците посочија дека има голем интерес за откуп на зелката, и нема да има вишок.

Граничната фитосанитарна инспекција на Република Србија на преминот Прешево од утре (недела), ќе работи 7 дена во неделата, наместо 6 дена како досега. Оваа одлука на Србија, произлезе од првиот одржан состанок на Мешовитиот комитет на

Република Македонија и Република Србија.

Во согласност со седницата на заедничкиот Комитетет на надлежните институции на Република Македонија и Република Србија, а во насока на отстранување на сите бариери во меѓусебната трговија, надлежните институции од Република Србија го променија работното време на фитосанитарната инспекција на граничниот премин Прешево-Табановце.

На состанокот е договорено да се усогласи работното време на граничните фиросанитарни инспектори на Република Македонија и Република Србија на граничниот премин Прешево-Табановце.

Агенцијата за финансиска поддршка во земјоделството и руралниот развој ги  известува земјоделските стопанства дека рокот за поднесување на барања за субвенции за 2018 година е започнат и ќе трае до 15 мај.

„Во овој период ќе се поднесуваат барања за директни плаќања за растително производство и тоа за површини со поледелски и градинарски култури, лозови и овошни насади и за сточарско производство и тоа за одгледување на говеда, овци, кози, пчели, свињи, живина и за заклани животни во кланици“, изјави директорот на Агенцијата за финансиска поддршка во земјоделството и руралниот развој, Николче Бабовски.

Барањата се поднесуваат по електронски пат, самостојно од страна на барателите. Доколку барателите имаат потреба за помош при создавање на електронското барање, може да се обратат во подрачните единици на Министерството за земјоделство, шумарство и водостопанство.