Новости

Владата и натаму останува исклучително посветена на аграрниот сектор, истакна ресорниот министер Љупчо Димовски во денешното обраќање на Генералното собрание на Федерацијата на фармери на Република Македонија.

Министерот Димовски напомена дека државата ги смета здруженијата на земјоделците за свои партнери и неизбежно ги консултира при донесувањето на позначајните закони и прописи, како и при реализирањето какви било активности во земјоделството.

- Неколку години по ред Федерацијата активно учествува во изготвувањето на програмите за финансирање на земјоделството со свои сугестии. Целта на ваквата соработка е заедничкиот интерес за зголемување на аграрниот стандард и подигнување на социо-економските услови на руралното население, истакна министерот.

Интензивирање на соработката, размена на искуства, идеи и стоки, договорија на денешната прва средба министерот за земјоделство, шумарство и водостопанство Љупчо Димовски и неговиот албански колега Генц Рули, иницирана од Канцеларијата на Светска банка.

Нашето позитивно искуство ќе го пренесеме на албанската страна, бидејќи македонската соработка со Светска банка од аспект на приближувањето кон ЕУ во делот земјоделство е добар пример што може да се пренесе и во Албанија, изјави министерот Димовски.

Долгорочното влијание на климатските промени и предвидените негативни ефекти врз земјоделството, шумарството, водните ресурси, безбедноста на храната и биолошката разновидност,  како и можните сценарија за најсоодветен пристап во намалувањето на чувствителноста и прилагодување кон климатските промени, ќе се вброи меѓу најважните приоритети на министерството за земјоделство, шумарство и водостопанство-истакна министерот за земјоделство, шумарство и водостопанство Љупчо Димовски на денешната работилницата за подигање на свеста за намалување на штетното влијание од климатските промени врз земјоделството во Македонија.Работилницата која ја  организираше Светска Банка претставува почетокот на иницијативата на Светска Банка за подготвувањето на Регионалната програма за намалување на последиците од климатските промени во земјоделскиот сектор.

Наместо 300.000 евра што беше лимит досега, винарските визби ќе може да земат максимален заем од 700.000 евра со пет отсто годишна камата од земјоделскиот кредитен фонд. Целта на зголемувањето е да се исплатат заостанатите долгови кон лозарите од реколтата 2009 година.

Фондот годинава располага со 10 милиони евра од кои 2,5 милиони се за лозарите и винарите.

- Новите кредитобаратели може целиот износ од 700.000 евра да го наменат за отплата на долговите или со 300.000 евра да набават основни или обртни средства, но сумата над оваа до новиот лимит може да биде наменета само за подмирување обврски за откуп на грозје за преработка, рече денеска на прес-конференција заменик-министерот за земјоделство, шумарство и водостопанство Перица Иваноски.

Министерот за земјоделство, шумарство и водостопанство Љупчо Димовски денеска во Радовиш присуствуваше на свеченото пуштањето во употреба на млекарницата „Ѓоргиеви“.

Млечната индустрија „Ѓоргиеви“ постои од 2005 година како претходен дел од ЗИК „Радовишко поле“ во стечај. Со 25 тони млеко дневен капацитет, моментно произведува преработки од млеко,сирење и кашкавал, овчи, кравји и мешан.

- Изминативе неколку години во објектот инвестиравме 150.000 евра. Целосно го реконструиравме, одвнатре и однадвор, ставивме нов под, вградивме линија за производство на кашкавал и путер.  Сега ги имплементираме потребните меѓународни стандарди за квалитет и безбедност.

Очекуваме да бидат спроведени за максимум шест месеци, изјави Драги Ѓоргиев, сопственик на млекарницата.