Новости

Зајакнување на капацитетите на Факултетот за земјоделски науки и храна во областа на градинарството, хортикултурата, производството на семе и саден материјал, во заштитата на растенијата, сточарското производство но, пред се во наводнувањето се секторите во кои треба да се интензивира соработката во делот на науката. Ова беше истакнато на денешната средба на израелската делегација преводена од Орид Нокт, министерката за земјоделство и рурален развој на Израел со претставниците на Факултетот за земјоделски науки и храна од Скопје и членовите на Македонско-израелскиот бизнис клуб.

Како што потенцира Драги Димитриевски, декан на Факултетот за земјоделски науки и храна, наставната програма на оваа научна институција  е прилагодена на потребите на стопанството, а со помош на државата се обезбедуваат најсовремените услови за образование на  потребниот кадар во агросекторот.

Преку 50 локации со површина од 4 до 5 илјади метри квадратни и почетна цена од евро за метар квадратен ќе понуди државата на продажба за градење винарски визби низ Македонија, соопшти заменик-министерот за земјоделство, шумарство и водостопанство Зоран Коњановски по денешната посета на неколку откупни пунктови за грозје во Кавадаречко.

-  Изградбата на винарските визби покрај веќе обезбедените субвенции, ќе значи остварување дополнителна вредност, развој на лозарските региони и винскиот туризам, постигнување повисоки откупни цени и поголема конкуренција, истакна Коњановски.

Моментно Министерството работи на расчистување на 78 локации од кои 20 ќе бидат во Кавадаречко, 28 во Неготинско и осум во Росоман, доволен број, како што нагласи Коњановски, за развој на винарството, винската индустрија и винскиот туризам.

Тој оцени дека овој владин проект, изградбата на т.н. пат на виното, е убава вест особено за сите што се занимаваат со лозарство.

Откупот на првите количини грозје во Кавадаречко се одвива без какви било проблеми, цените се навреме истакнати, а регуларна е и проценката на квалитетот. Ова денеска директно имаше можност да го види и заменик-министерот за земјоделство, шумарство и водостопанство Зоран Коњановски кој посети неколку откупни пунктови.

- Дојдов да се уверам како тече откупот. Посетив неколку пунктови, разговарав со оние што го произведуваат грозјето, но и со оние што го преземаат. Иако откупната сезона е на почеток, сите се задоволни, изјави Коњановски.

Целта на Владата, напомена заменик-министерот, е да помага во дијалогот меѓу лозарите и винарите за да се постигне кооперантски однос меѓу двете страни.

-   Договореното е најсигурно. Затоа упорно ќе работиме на приближување и помагање на дијалогот, истакна Коњановски.

Според него, активностите на ресорното Министерство за надгледување и спроведување на откупот што почна пред околу 40 дена преку средби со винариите и лозарите веќе даваат резултат.

До 10-ти септември продолжува 24 часовната целосна забрана за движење во шуми и шумски појаси, поради најавените релативно високи температури во следните две недели и отсуството на подолготрајни врнежи,соопшти денеска министерот за земјоделство, шумарство и водостопанство Љупчо Димовски.

Како што информира министерот Димовски, од 8 часот и 30 минути вчера до денеска во истото време се регистрирани 47 пожари од кои 17 класични, 27 на отворено и три урбани.

- Владиното Координативно тело за заштита на шумите од пожари исто така препорачува градоначалниците да ги ангажираат сите персонални и материјално-технички ресурси за заштита и спасување при појава на природни непогоди и пожари, во овој критичен период да одржуваат секојдневни состаноци со надлежните институции на локално ниво, јавните претпријатија и концесионерите на ловиштата и пасиштата со цел следење на состојбата со пожарите, како и во зависност од можностите да набават апарати за рачно гаснење на пожарите, истакна Димовски.

Како последица на зголемените температури од топлотниот бран кој деновиве повторно ја зафати нашава држава, зголемен е и ризикот од појава на шумски пожари. Секторот за аналитика и истражување при Дирекцијата за заштита и спасување предупредува дека во текот на утрешниот ден, во беровскиот,битолскиот, дебарскиот, во околината на Лазарополе, Маврово, во Валандовско и во охридско - струшкиот регион, зголемена е опасноста од појава на шумски пожари. Поради екстремно  сушниот период предизвикан од високите температури и најавата на Управата за хидрометеоролошки работи за појава  на засилен ветер во текот на наредните денови ќе подигнат е степенот на мобилност на екипите за  заштита од пожари и во регионот на Преспа, Прилеп, Радовиш, Скопје, на Солунска Глава како и во тетовскиот, велешкиот и во регионот на Пробиштип.