Новости

Владата ја донесе годинашната Програма за финансиска поддршка на земјоделството вредна 6,23 милјарди денари или 113 милиони евра. Како што соопшти денеска на прес-конференција вицепремиерот за економски прашања Владимир Пешевски, направени се измени во дизајнирањето на субвенциите кои се поголеми од лани за 12 отсто, при што поголем акцент е ставен на сточарството и градинарството.

Програмата содржи вкупно 37 мерки, но секаде се следи стратегискиот правец, да им се посочи на земјоделците кон кои култури повеќе да се фокусираат. Од проектираните средства, 3,49 милијарди денари се за растително производство, 2,3 милијарди се наменети за сточарството, а 130 милиони денари се за органско производство.

Откупот на тутунот годинава кај нас е далеку подобар во однос на останатите земји од соседството и еден месец пред крајниот законски рок веќе се откупени 80  проценти од годинашнава реколта.  Министерството за земјоделство и годинава ќе го субвенционира секој откупен килограм тутун со 60 денари, а согласно Законот исплатата на субвенциите ќе заврши заклучно со јуни.

Ова го изјави  заменик-министерот за земјоделство, шумарство и водостопанство Зоран Коњановски при посетата на општините Василево и Босилово.

Според Коњановски, откупот на тутунот се одвива во најдобар  ред и за разлика од минатата година, како што рече, тутунопроизводителите се задоволни од постигната просечна откупна цена на ниво на држава од 162 денари за килограм. Ова значи  повисоки цени од 25 до 30 отсто во однос на ланските, укажа Коњановски.

Министерот за земјоделство, шумарство и водостопанство, Љупчо Димовски, и неговиот српски колега Министерот за земјоделство, трговија шумарство и водостопанство, Душан Петровиќ заедно со Директорот на Агенцијата за храна и ветерина Дејан Рунтевски денес во Земјоделската комора на Србија потпишаа договор за фитосанитарна соработка и договор за соработка во областа на безбедноста на храна и ветерината.

Договорите се потпишуваат со цел да се обезбеди непречен промет на растенија, растителни производи и производи од животинско потекло.

Фитосанитарната соработка ја потпишаа министерот Љупчо Димовски и неговиот српски колега министерот за земјоделство на Р. Србија Душан Петровиќ, а соработката во областа на ветерината и безбедноста на храната ја потпишаа министерот Петровиќ и директорот на Агенцијата за храна и ветерина Дејан Рунтевски.

Македонија има и произведува доволно храна, од тој аспект не спаѓа во групата загрозени земји, но мора рационално да ги користи природните ресурси и да води сметка за последиците од климатските промени, изјави министерот Љупчо Димовски по завршувањето на Самитот на министрите за земјоделство во Берлин.

- Поседиците од климатските промени веќе се чувствуваат, но работиме на нивно ублажување. Ги почитуваме сите препораки на Светска банка, домашните и странските експерти. Интензивно разговараме и за заштитата на водата. Во овој сегмент мора да бидеме многу внимателни зашто не можеме да се пофалиме дека сме богати со природни водни ресурси. Сепак, ако домаќински, ефикасно ги експлоатираме, можеме да обезбедиме квалитетно наводнување за земјоделските површини, истакна Димовски.

,,Регионот е гладен за инвестиции кои ќе го модернизираат земјоделското производство. Нашите земји ја разбираат важноста и даваат приоритет на ЕУ интеграцијата. Од тие причини, ја интензивиравме соработката со цел да се придвижиме напред согласно европската агенда,, - рече министерот за земјоделство, шумарство и водостопанство Љупчо Димовски во денешното обраќање на Глобалниот форум за храна и земјоделство во Берлин.

Отворајќи ја панел-дискусијата „Обезбедување храна преку одржлив раст – земјоделско производство во услови на ограничени ресурси“, Димовски, во својство на претседавач со Постојната работна група за регионален рурален развој, се осврна на пристапувањето на земјите од Југоисточна Европа (ЈИЕ) во Европската унија, улогата и потенцијалот на аграрот во нивните економии, инвестициите и зајакнувањето на партнерствата.

Европа да ја искористи можноста за соработка и инвестиции во регионот на ЈИЕ, беше неговата клучна пораката.