Премиерот Никола Груевски го посети поплавеното место Раотинце каде изминативе два дена надојдените води на Вардар

Премиерот Никола Груевски го посети поплавеното место Раотинце каде изминативе два дена надојдените води на Вардар поплавија околу 30 куќи и 200 хектари обработливо засеано земјоделско земјиште.

Премиерот заедно со министерот за земјоделство, шумарство и водостопанство Љупчо Димовски и директорите на Центарот за управување со кризи и на Дирекцијата за заштита и спасување ги посетија жителите со цел од терен да утврдат со какви проблеми се соочуваат и дали Владата може некако да помогне.

Груевски по средбата со жителите рече дека вчера бил критичниот ден и оти денеска водата е повлечена. Разговарано е, додаде, со сите надлежни институции и со ЕЛЕМ кои брзо реагирале и го намалиле протокот на води од мавровските хидроцентрали.

- Ова не се случува првпат. Поплави на ова подрачје имало и порано. Очигледно е дека овој дел е критичен и треба да се изнајде решение на подолг рок, изјави премиерот Груевски.

- Откако нашите служби ќе го анализираат проектот и ако се покаже дека со тоа трајно ќе се реши проблемот, ќе почнеме со негова реализција, нагласи Груевски и најави дека од утре на терен ќе излезат и екипите за проценка на штети.

Во Раотинце денеска ситуацијата е нормализирана, водата е повлечена во коритото на реката и нема повеќе излевања.