Средба на министерот Љупчо Димовски со новинарите

Со оглед на глобалната економска криза, 2009 година не беше лоша за македонското земјоделство, оцени ресорниот министер Љупчо Димовски на денешната завршна средба со новинарите.

- Успешноста на годината не зависеше од нас. Последиците од кризата која се прелеа во реалниот сектор, ги почувствуваме и ние. Пазарите се затворија,  а тоа го намали пласманот на одредени земјоделските производи.Според него, 2009 беше најдобра за тутунарите, а најлоша за лозарите. - Откупната цена на тутунот и негово преземање од страна на преработувачите, треба да биде пример за другите сектори, нагласи Димовски.

Државата, сепак, може да се пофали со сработеното кое доби и своевидна потврда преку европската акредитација за целосно самостојно управување со претпристапните ИПАРД фондови.

Најавувајќи ги планираните активности за претстојната 2010 година, министерот истакна дека новиот закон за земјоделство и рурален развој што веќе се изготвува, ги дефинира условите и критериумите за откуп на стратешките култури, житните, градинарските, грозјето. Склучување договори, навремено објавување на откупните цени и обезбедување финансиски гаранции за исплата на родот, се само дел од законските обврски.

Идната година, освен хармонизација на домашното законодавство со европското, во фокусот на Министерството ќе биде и едукацијата на земјоделците за што поквалитетно производство, нивно здружување и работење според принципите на пазарната економија. Меѓу приоритетите ќе биде и ефикасното искористување на ИПАРД средствата, како и реализирањето на субвенциите кои се проектирани на 100 милиони евра.

- Финансиската поддршка никако не смее да биде социјална категорија, туку алатка за зголемување на конкурентноста, потенцира Димовски.