Министерот Димовски на Основачкото собрание на Македонската Национална Асоцијација на Винарии

Министерот за земјоделство, Љупчо Димовски, присуствуваше на Основачкото собрание на Македонската Национална Асоцијација на Винарии.
Во своето воведно обраќање пред присутните претставници од винарските визби, министерот Димовски истакна дека бројките и резултатите од последниве неколку години за остварувањата во областа на винарството се соодветен показател првенствено за вашата успешна работа, но и за напорите кои министерството за земјоделство и Владата на Република Македонија во целина, ги вложуваат во развојот на оваа гранка.

„Поради тоа и во оваа прилика, уште еднаш би сакал да ве уверам дека министерството ќе продолжи и понатаму со големо внимание и несмален интензитет, со сериозен, посветен, и пред сè партнерски однос во поддршката на винарството, со цел од една страна постојано да се надградува партнерство меѓу нас, а од друга страна, да се подобри и зајакне имиџот на Република Македонија како земја на виното, придонесувајќи кон зголемување на придобивките од поголема потрошувачка, извоз и препознатливост на македонското вино во заеднички интерес на сите нас.- рече министерот Димовски.

На Основачкото собрание на Македонската Национална Асоцијација на Винарии присуствуваа 35 винарски визби основачи на асоцијацијата, чии цели се: остварување и усогласување на поединечните и заедничките интереси на членовите на здружението, утврдување на приоритети за развој на винарството и лозарството во Република Македонија, зголемување на препознатливоста и извозот на македонските вина со додадена вредност на регионалните и меѓународните пазари, развој на винската култура во земјата и зголемување на домашната потрошувачка на вино и унапредување на односите помеѓу сите чинители во винскиот сектор во Република Македонија.

Во рамките на Собранието, за потребите за регистрација на Македонската Национална Асоцијација на Винарии во Централниот регистар на РМ, како и за идно дејствување на асоцијацијата, беа донесени основните акти на асоцијацијата, Акт за основање на Македонската Национална Асоцијација на Винарии,  Статут на Македонската Национална Асоцијација на Винарии и  Програма за работа на Македонската Национална Асоцијација на Винарии  за 2014 година и беа избрани нејзините органи, Претседател на Собранието, Претседател и членови на Управниот одбор и Претседател и членови на Надзорниот одбор на Македонската Национална Асоцијација на Винарии.

Се очекува веднаш по регистрирањето на асоцијацијата, истата активно да започне со реализација на своите активности во остварување на своите цели.