Соопштенија

Денес во Министерството за земјоделство, шумарство и водостопанство министерот Љупчо Димовски оддржа средба со тим од експерти–инженери, предводен од Јавуз Карадаг, претставници на Министерството за шумарство и водостопанство на Републиа Турција.
Оваа средба е резултат на минатогодишната посета на министерот Димовски на Анкара и средбата со министерот Вејсел Ероглу, на која  е договорено експертски тим од турското министерство за шумарство и водостопанство да и понуди стручна помош на Република Македонија во областа на наводнувањето со проектирање на мини хидроакумулации.
Министерот Димовски напомена дека изградбата на овие мали хидроакумулации претставува голема помош за зиндивидуалните земјоделски производители во производството на земјоделски култури.
Турските експерти ветија помош со своето знаење и искуство во проектирањето на предвидените мали хидроакумулации.
Во текот на оваа недела предвидени се теренски посети на системите за наводнување.

Министерот Љупчо Димовски и министерот Џери Наумов денес, во Министерството за земјоделство, шумарство и водотопанство одржаа средба со  претставници на израелската компанија Бен Дор, компанија која развива нови сорти на овошје, со посебен акцент на вкусот и аромата, и која поседува овоштарници, но го одржува и стабилното снабдување со производи со врвен квалитет во текот на сите сезони. Компанијата ги поседува меѓународните стандарди за квалитет, вклучувајќи GLOBALGAP,  BRC и ISO 9001 и поседува пакувачки капацитети, ладилници и транзит станици и е распространета ширум светот.

Министерот за земјоделство, шумарство и водостопанство Љупчо Димовски во рамките на своите програмски активности и надлежности денеска изврши обиколка и контрола на млекопроизводствени капацитети во Битола и битолско.

За време на посетата на битолската млекарница БиМилк министерот Димовски посочи дека средбата со менаџментот на млекарницата овозможила да се информира за проектите кои ги реализира МЗШВ во соработка со таа компанија, со која како што рече министерот Димовски имаат традиционално добри партнерски односи.

Министерот за земјоделство, шумарство и водостопанство Љупчо Димовски денеска ја посети свињарската фарма на земјоделската задруга „Единство“ во Челопек за да се информира како тече откупот на вишокот свежо свинско месо.

- На последниот состанок со земјоделците и преработувачите договоривме да бидат откупени поголеми количини свежо свинско месо од домашните производители и со тоа да се надмине проблемот со пласманот на вишокот од околу 300 грла свињи или 180 до 200 тони месо, изјави министерот Димовски.

Според него, вкупниот број свињи во Македонија како резултат на владините мерки е евидентно зголемен. Радува и податокот дека околу 90 отсто од свежото свинско месо на пазарите во Македонија е од домашно производство, а истовремено е добар и откупот во преработувачките капацитети кои се извозно ориентирани.

Министерот Димовски оцени дека причина за вишокот свежо свинско месо се велигденските пости поради кои побарувачката е намалена.

Околу 17 отсто помалку ќе тежи годинашната реколта тутун, но сите производители кои лани склучија договори за откуп, тоа ќе може да го сторат и во 2014-та.

Со ова намалување на производството што денеска на средба го договорија вицепремиерот и министер за финансии Зоран Ставрески, министерот за земјоделство Љупчо Димовски, претставниците на тутунарите и откупните компании, заштитена ќе биде најранливата категорија производители која се занимава со оваа дејност од егзистенцијални причини и остварува максимален принос до 500 килограми.

- Во оваа тешка ситуација кога сите се соочивме со сериозен проблем однадвор, најдовме решение кое ќе ги задоволи сите страни. За 24.500 тутунари од вкупниот број, речиси ќе нема намалување на производството. Производителите може да бидат спокојни, ќе се заштитат сите што одгледуваат тутун од егзистенцијални причини. Може да бидат убедени и во сигурен пласман, изјави вицепремиерот Ставрески.

Тој појасни дека при склучувањето на договорите што треба да заврши до 10-ти април, количините ќе се усогласуваат пропорционално.